الاثنين، 27 يونيو 2011

بيني وبينك - بالعامية المصرية

بيني وبينك ليل

وخوف غربة

وغربة خوف .. ماهوش لاقي ما بيننا مكان

بيني وبينك صمت بيوسّع مكان لعيوننا تتلاقى ...

عشان تهمس بسر ماحدش غيرنا ماعرفهوش

لكين برضه هيفضل سر


عرفتيني؟

ماحبش أحتمي بهوجة...

ولا أحمي أنا هوجة

أحب أكون أنا موجة...

ف عرض البحر تدّارى ف كام موجة...

شبهها صحيح لكين برضه ماهمّاش هيّة

أحب أكون أنا موجه ماحدش يعرف ايه جواها غير هيّة...

ومش بتسابق اخواتها عشان ترمي حمولتها على شط الزعيق والناس

لكين إذا ما البحر يوم قرر بإن أوانها آن الآن...

تطاوعه لكين مسافة ما تؤدي الفرض...

وترجع تاني لجدورها

ماهي موجة لكين شجرة ورابطة روحها ف مكانها...

تغيب مهما تغيب عنه مسيرها ترد


عرفتيني؟

أنا اللي صحيت وانا ميّت

أنا اللي متّ وانا صاحي

أنا الماشي على ظلي

أسابقه شوية .. يسبقني

أطاوعه شوية .. يخدعني

ويتخفى ف صورة .. أقول بتشبهني

ويدّارى .. فاكون عارف بإني قبل ما أدور على شبهه ...

هييجي بسرعة يلحقني


عرفتيني؟

عرفتي إن بيني وبينك ...

كل اللي بيني وبينك لسة سر

لأنه أصله وف الأساس...

بيني وبيني






باسم زكريا

27-6-2011

ليست هناك تعليقات:

إرسال تعليق